دنیا میں شاید ہی کوئی میاں بیوی ہوں، جن میں کبھی لڑائی نہ ہوئی ہو، لیکن اصل مسئلہ لڑائی کے بعد بیگم کو منانے کا ہوتا ہے۔اگر کسی وجہ سے شریک حیات ناراض ہو جائے تو پھر اسے کیسے منایا جائے۔ ہاتھ جوڑے جائیں، قسمیں کھائی جائیں یا صرف معافی مانگ کر اعتراف کر لیا جائے؟سچ کہا جائے تو اگر آپ اپنے ہم سفر کے ساتھ مخلص ہوں تو یہ اتنا مشکل کام نہیں ہے۔لیکن دنیا بھر میں اپنے رشتے کو بر قرار رکھنے کے لیے لوگوں نے بہت کچھ کیا جو حیران کن بھی ہے لیکن شادی کا رشتہ اہم ہی اتنا ہے کہ کوشش کرنے والے مشکل اور بعض اوقات عجیب حربےبھی آزماتے ہیں۔
سعودی عرب میں بھی ایک شوہر نے ناراض بیگم کو منانے کیلئے کچھ انوکھا کر ڈالا مگر بدلے میں تنقید بھی سننے کو ملی۔سعودیہ کے اسکول میں عملے کی ایک خاتون رکن کے شوہر نے بیوی کے ساتھ لڑائی کے بعد اسے راضی کرنے کے لیے ان کے اسکول کا کمرہ سجا ڈالا۔ مختلف انداز میں محبت کا اقرار کیا اور ساتھ ہی خواتین کی کمزوری یعنی گولڈ کا تحفہ بھی دیا. کمرے میں ہر طرف گلاب کی پتیاں اور کرنسی نوٹ بکھرے تھے۔ دیواروں پرغباروں اور آرائشی اشیاءسے سجاوٹ کی گئی تھی اور کمرے کے ایک کونے میں ڈھیروں گلدستوں کے بیچوں بیچ سونے کا سیٹ رکھا تھا۔صرف یہی نہیں کمرے کے وسط میں میز پر ایک بڑا کیک اور اطراف میں مختلف اقسام کے چھوٹے کیک بھی موجود تھے۔ دیوار اور مختلف اشیاء پر خاتون کا نام ”خلود “‘ بھی درج تھا۔ شوہر کی اس کاوش کی ویڈیو تیزی سے سوشل میڈیا پروائرل ہوئی جو کسی کے من کو بھائی تو کسی نے خوب تنقید کا نشانہ بنایا۔
ہیوسٹن، ٹیکساس سے تعلق رکھنے والے جوز ایل ٹورس نامی شخص نے اپنی شریک حیات کا بھروسہ دوبارہ سے قائم کرنے کیلئے اپنی چھاتی پر مستقل طور پر معافی اور اعتراف نامہ گدوا لیا۔ٹورس کا کہنا ہے کہ ایسا اس نے اپنی بیوی کے اعتماد کو دوبارہ سے جیتنے کیلئے کیا ہے۔ اس نے لکھا کہ وہ اپنی شادی شدہ زندگی بہت تکلیف دہ ہو جانے پر شرمندہ ہے۔ معافی نامے میں ٹورس نے اپنے جھوٹے اور دوغلے ہونے کا اعتراف بھی کیا ہے۔
دو سال قبل کندھ کوٹ میں ناراض بیوی کو منانے کے لئے شوہر بجلی کے کھمبے پر چڑھ گیا تھا۔ کچھ عرصہ قبل پسند کی شادی کرنے والی خاتون گھریلو جھگڑے سے تنگ آکر طلاق لینے کے لئے عدالت پہنچی تھی۔عدالت کے باہر شوہر کی کوششوں کے باوجود بھی بیوی نہ مانی تو شوہر نے11 ہزار ہائی ٹینشن بجلی کے کھمبے پر چڑھ کےخودکشی کی کوشش کی۔بروقت اطلاع پر سیپکو نے کھمبے کی بجلی بند کردی، جبکہ پولیس نے خاتون کے شوہر کو گرفتار کر لیا۔
چین کے شہرگوانگیوان شہرسے تعلق رکھنے والے وانگ نامی شخص کا اپنی بیوی سے جھگڑا ہوا تو وہ ناراض ہو کر چلی گئی۔اسے واپس لانے کے لیے وانگ نے 3000 یوان میں شہر کی 626 ٹیکسی کاروں کی اشتہاری جگہ خرید لی۔ وانگ نے وہاں لکھوایا کہ ”ہنی، میں غلط تھا“ اور ”سوئیٹی مجھے معاف کر دو“وانگ کا طریقہ کام کر گیا اور اس کی بیوی نے اس سے فون پر بات کر لی۔
تو اب آپ کیا سوچ رہے ہیں؟اگر آپ یہ سوچ رہے ہیں کہ یہ سب بہت مشکل اور عجیب ہے تو امید کرتے ہیںآپ اپنی بیگم کو ناراض نہیں کریں گے اور کوشش کریں گے کہ حالات وہاں تک نہ پہنچیں جہاں جا کر سب سنبھالنا مشکل ہو جائے۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
