مشرقی اور روائتی معاشروں میں جب شادی کی جاتی ہے تو عمر کے فرق کو بہت اہمیت دی جاتی ہے اوریہ سوچ پائی جاتی ہے کہ اگر لڑکا اور لڑکی کی عمر میں اتنا فرق ہو گا تو تب ہی شادی کامیاب ہو گی اور یہ معاشرے کے قائم کردہ معیار سے کم ہو یا زیادہ ہو گی تو شادی کامیاب نہیں ہو گی یا پھر اس شادی میں مسائل ہوں گے،یہ ہی وجہ ہے کہ اگر کوئی لڑکا اپنی عمر سے بڑی عمر کی لڑکی سے شادی کر لے تو اسے پسند نہیں کیا جاتااور کہا جاتا ہے کہ جلد یہ شادی نا کام ہو جائے گی اور باقاعدہ اس کی کئی وجوہات بیان کی جاتی ہیں اسی طرح جب کوئی لڑکی کسی ادھیڑ عمر شخص سے شادی کر لے تو اسے بھی شدید تنقید کا سامنا کرنا پڑتا ہے۔ایسے میں پاکستانی شو بز انڈسٹری کی کچھ شخصیات نے اس سوچ کو غلط ثابت کیا اور عمر کا کافی فرق ہونے کے باوجود وہ ایک کامیاب ازواجی زندگی گزار رہے ہیں۔آئیے ان شخصیات کے بارے میں جانتے ہیں۔
یسریٰ رضوی اور عبد الہادی
یسریٰ رضوی اور عبد الہادی کی شادی نے لوگوں کی بہت زیادہ توجہ حاصل کی اور اس توجہ کی وجہ ان دونوں کی عمر میں فرق ہے۔یسریٰ رضوی دقیانوسی تصورات پر یقین نہیں رکھتیں اور اس کا اظہار انھوں نے اپنے سے 12سال چھوٹے آدمی سے شادی کر کے کیا۔جب ان دونوں کی شادی ہوئی تو یسریٰ 36سال کی تھیں جبکہ عبد الہادی 24سال کے تھے۔ان کی شادی کے بعد سوشل میڈیا پر بہت زیادہ باتیں ہوئیں اور یسریٰ نے ان سب باتوں کا جواب دیا۔انھوں نے لوگوں کو باور کروایا کہ کم عمر کے شخص سے شادی کرنا مذہبی،اخلاقی یا کسی بھی لحاظ سے کوئی غلط بات نہیں اور یہ کہ شادی کی کامیابی کے لیے عمر سے زیادہ ذہنی ہم آہنگی ضروری ہوتی ہے۔
وسیم اکرم اور شہنیرا
وسیم اکرم اور ان کی دوسری بیوی شہنیرا کی جوڑی کی بہت تعریفیں کی جاتی ہیں،وہ ایک مثالی جوڑے کے طور پر جانے جاتے ہیں حلانکہ ان دونوں میں عمر کا بہت زیادہ فرق ہے۔وسیم اکرم نے جب شادی کی اس وقت ان کی عمر 50سال تھی جبکہ شہنیرا کی عمر 33سال تھی۔دونوں کی جوڑی بہت پسند کی جاتی ہے اور عمر کے فرق کے باوجود ان کی شخصیات میں بہت سی باتیں مشترک پائی جاتی ہیں اور یہ ہی وجہ ہے کہ ان میں بے حد محبت پائی جاتی ہے۔شہننیرا آسٹریلین ہونے کے باوجود پاکستانیوں کے رنگ میں رنگ گئی ہیں۔ان دونوں کی ایک بیٹی بھی ہے۔
عارفہ صدیقی اور تعبیر علی
عارفہ صدیقی شو بز کی ایک مشہور گلوکارہ اور اداکارہ ہیں۔ان کی پہلی شادی استاد نظر حسین سے ہوئی جو عمر میں ان سے30سال بڑے تھے،وہ عارفہ کے موسیقی کے استاد تھے اور یہ محبت کی شادی تھی۔23سال کی شادی کے بعد2018میں استاد نظر کے فوت ہونے کے بعد عارفہ صدیقی نے تعبیر سے شادی کی جو ایک کمپوزر اور گلو کار ہیں۔عارفہ صدیقی اور تعبیر علی کی جوڑی ایک مثالی جوڑی اور وہ دوسرے لوگوں کے لیے ایک مثال بن گئے ہیں۔یہ دونوں اب خود نئے گانے ریلیز کر رہے ہیں جنھیں اچھی موسیقی سننے والوں میں بہت پسند کیا جا رہا ہے۔
شعیب اختر اور رباب خان
شعیب اختر کسی تعارف کے محتاج نہیں ہیں۔وہ نہ صرف کرکٹ کے بہترین کھلاڑی کے طور پر جانے جاتے ہیں بلکہ ان کے آئے دن جوش سے بھرے بیانات بھی ان کی سوشل میڈیا پر مقبولیت کا باعث ہیں۔انھوں نے رباب خان سے شادی کی جب وہ 41سال کے تھے اور ان کی بیوی 23 سال کی تھیں۔عمر کے اس قدر فرق کے باوجود یہ جوڑی ایک کامیاب زندگی گزار رہی ہے اور لوگوں میں خاصی مقبول ہے۔ان کی شادی کو 6سال سے زائد ہو چکے ہیں اور ان کا ایک بیٹا بھی ہے۔
فیصل قریشی اور ثنا ء فیصل
فیصل قریشی ابھی تک تین شادیاں کر چکے ہیں اور ان کی تیسری بیوی ثناء فیصل ان سے 10سال چھوٹی ہیں اور دو شادیوں کی نا کامی کے بعد یہ جوڑی ایک کامیاب شادی شدہ زندگی گزار رہی ہے۔ان دونوں کے دو خوبصورت بچے بھی ہیں اور یہ ایک مثالی جوڑی ہیں۔عمر کا اتنا زیادہ فرق ان کی شادی کے لیے خاص اہمیت نہیں رکھتا،وہ اکثر تقریبات میں اکھٹے اور زندگی سے لطف اندوز ہوتے نظر آتے ہیں۔یہ دونوں اس بات کا ثبوت ہیں کہ عمر سے کوئی فرق نہیں پڑتا اصل اہمیت ذہنی ہم آہنگی کی ہے۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
