موسم گرما اختتام کے قریب ہے اور موسم سرما کا آغاز ہونے کو ہے ، یہ موسم شادی بیاہ سمیت دیگر تقریبات کے نہایت موزوں ہے۔ اس موسم میں لباس اور طعام دونوں ہی راحت اور مزہ دیتے ہیں۔اس موسم سے پوری طرح لطف اٹھانے کے لیے ضروری ہے کہ ابھی سے اس کی تیاری شروع کر دیں اور کچھ باتوں کا ضرور خیال کریں تاکہ اگلے سال تک ایسی یادیں ساتھ رہیں جن کو دیکھ کر خود بخود چہرے پر مسکراہٹ آجائے۔
رنگ و روپ کا خیال
شادی سیزن شروع ہوتے ہی دلہنوں کے ساتھ ساتھ وہ خوااتین جنھیں شادی میں شرکت کرنی ہوتی ہے انھیں چاہیے کہ عین ٹائم پر فکر مند ہونے کے بجائے دو تین مہینے پہلے کام شروع کر دیں ۔اگر وزن کم کرنا ہے تو ایک پلان تیار کر لیں اور اگر رنگ روپ نکھارنا چاہتی ہیں تو اس کے لیے بھی کچھ معیاری پراڈکٹس اور سیلونز کے بارے میں جان لیں۔
لباس اور آرائش کی تیاری
شادی کیونکہ ایک بہت اہم موقع ہوتا ہے خاص طور پر ہمارے ہاں تو اس کی تقریبات ہفتہ بھر چلتی رہتی ہیں تو مہینوں پہلے اس کی تیاری بھی کی جاتی ہے۔کیا فیشن میں ہے اور کیا ہمارے بجٹ میں ہے۔کس لباس کو ری نیو کیا جا سکتا ہے؟کس کی میچنگ اشیاء درکار ہیں؟اور سب سے بڑھ کر آپ کونسا نیا پہناوا پہننا چاہیں گی جس کو پہن کر سب کی تعریفیں سمیٹ سکیں۔اس کے ساتھ ہی زیورات بھی شادی کا لازمی جُز ہیں اس لیے یہ بھی دیکھنا ضروری ہے کہ زیورات کی خریداری کس طرح کرنی ہے اور جو پہلے سے موجود ہیں انھیں استعمال میں کیسے لانا ہے یہ بھی سوچنا ضروری ہے۔
گھر کی صفائی اور آرائش
ہمارے گھروں میں سالانہ صفائی،پینٹ اور پھر کچھ ضروری آرائش سال میں ایک دفعہ ضرور ہوتی ہے اور کوشش کی جاتی ہے کہ بر سات کے بعد اور شادی سیزن سے پہلے درمیانے موسم کا فائدہ اٹھاتے ہوئے یہ کام کروا لیے جائیں۔اس طرح شادی کی تقریبات کو چار چاند لگ جائیں گے اور شادی کا سیزن مزید بہتر ہو جائے گا۔
بجٹ کا بھی خیال کریں
بجٹ کی منصوبہ بندی کیے بغیر کوئی بھی کام ممکن نہیں ہوتا اس لیے اس اہم نقطے کو بھی ذہن میں رکھیں کہ تیاری بجٹ کے مطابق کی جائے تاکہ خوشی میں اضافے کے بجائے سال بھر قرض میں نہ ڈوبے رہیں۔شادی کی تیاریاں کرتے ہوئے پریشان ہونے کی ضرورت نہیں ، بلکہ اپنے بجٹ کو مدنظر رکھ کر خریداری کی شروعات کریں۔اچھے ماحول میں باہمی مشاورت سے خریداری کریں اور بچوں کی پسند ناپسند کو بھی سامنے رکھیں، اس بات کا بھی خیال رکھیں کہ بچوں پر کون سے رنگ اچھے لگتے ہیں۔
یہ بات ذہن سے نکال دیں کہ آپ کو صرف نمود و نمائش کے لیے ہی شادی میں شرکت کرنی ہے۔ ایسے کپڑے خریدیں جو نہ صرف شادی کی تقریب میں کام آسکیں، بلکہ اس کے بعد بھی وقتاً فوقتاً کسی پارٹی میں کام آ سکیں۔شادی کی تقریبات میں مہذب انداز سے لطف اٹھائیں اور سلیقہ شعاری سے اپنی صلاحیتیوں کو منوائیں، اسی طرح شادیوں کے موسم کو پر لطف بنایا جا سکتا ہے۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
