عید الفطر جوں جوں قریب آرہی ہےدنیا بھر کی طرح پاکستان میں بھی عید کی تیاریوں میں غیر معمولی تیزی آگئی ہے۔ عید ہو اور پاکستانی خواتین سج دھج کر تیار نہ ہوں یہ تو ہو ہی نہیں سکتا۔ہر تہوار کی طرح، عید الفطر پر بھی خواتین خوب سے خوب تر نظر آنے کے لئے کئی طرح کے جتن کرتی ہیں اورخواتین کی عید کی تیاریاں دیدنی ہوتی ہیں۔اس بلاگ پوسٹ میں ہم کچھ خواتین کی عید کی تیاریوں کے بارے میں بات کریں گے۔
عید کا جوڑا
عید کی تیاریوں میں سب سے اہم مرحلہ عید کے جوڑے کا انتخاب ہے جو خواتین اپنی پسند اور فیشن کی مناسبت سے کرتی ہیں ۔عام طور پر خواتین عید کے کپڑوں کی خریداری رمضان کے پہلے عشرے ہی سے شروع کر دیتی ہیں ۔ان دنوں خواتین کا عید کی شاپنگ کے لئے خواتین کا ریڈی میڈ کپڑوں کا انتخاب عروج پر ہے۔ ان کی خواہش ہوتی ہے کہ اپنے لئے آرام دہ خوبصورت اور منفرد ڈریس کا انتخاب کریں، کیونکہ عموماً عیدکا دن مصروفیت میں گزرتا اس لئے وہ ایسا لباس لیں جسے پہن کر امورِ خانہ داری بھی نبٹا سکیں عید پر ہر خاتون کی خواہش ہوتی ہے کہ وہ اپنی تیاری میں بالکل منفرد نظر آئے۔ منفرد نظرآنا ہر لڑکی کی خواہش اور ایک فطری امر ہے۔ اسی طرح خواتین عید کا جوڑا پسند کرنے میں بھی اس روایت کو برقرار رکھتی ہیں اور کافی وقت لگانے کے بعد انہیں کوئی جوڑا پسند آتا ہے۔اب بھی کئی خواتین کپڑے سلوانا پسند کرتی ہیں۔ جن خواتین نے رمضان کی ابتدا میں کپڑے خرید کر ٹیلر کو سیلنے کے لئے دے دیئے تھے ان کے لئے پریشانی کی کوئی بات نہیں ہے البتہ جن خواتین نے ایسا نہیں کیا تھا انہیں اب ٹیلر کی دکانوں پر ’’ہاؤس فل‘‘ کی تختی نظر آجائے گی۔ وہ مایوس نہ ہوں، ریڈی میڈ کپڑے آپ کیلئے بہترین متبادل ثابت ہوسکتے ہیں۔ یہی نہیں پاکستان بھر کے ڈریس ڈیزائنرز نے بھی موسم کی مناسبت سے شیفون دوپٹوں والے لان کے ملبوسات کو فیشن کی ایک جدید شکل دی ہے۔ لان کے کرتے اور ٹراؤزر کے ساتھ ان دنوں لمبی قمیضوں کےساتھ ساتھ چھوٹی قمیضوں کا فیشن بھی شہر کی مختلف مارکیٹوں میں اِن ہے، تھری پیس سوٹ سمیت چھوٹی لمبی قمیضیں مارکیٹ میں دستیاب ہیں،جس کے ساتھ خواتین دوپٹے اور میچنگ ٹراؤزر بھی خرید رہی ہیں۔
عید کے جوڑے کی خریداری میں کچھ باتوں کا بھی خیال رکھیں ۔
کپڑے کا انتخاب کرنے کے بعد ایک مرتبہ پہن کر دیکھ لیں۔ بعض دفعہ نیٹ یا ایمبرائیڈری والے کپڑے چبھتے ہوئے محسوس ہوتے ہیں، اس لئے پہلے ٹرائل کر لینا مناسب ہوتا ہے۔
بازار میں کپڑوں کی خریداری کرتے وقت جو ڈریس پہلی نظر میں پسند آجائے اسے فوراً خرید لیں۔ خواتین اکثر مختلف کپڑے دیکھ دیکھ کر پریشان ہوجاتی ہیں کہ کون سا لوں؟ اس پریشانی سے بچنے کا بہترین طریقہ یہی ہے کہ جو کپڑا پہلے پسند آجائے اسے خرید لیں ورنہ یہ نہ ہو کہ آپ بعد میں افسوس کرتی رہ جائیں۔
لوازمات
کپڑوں کے بعد باری آتی ہے دوسرے لوازمات کی جن میں سر فہرست جیولری آتی ہے۔ بالیاں خریدتے وقت ڈریس ساتھ میں رکھیں، اس سے بالیاں خریدنے میں آسانی ہوتی ہے۔ بالیاں بہت بڑی بڑی نہ خریدیں، شوق میں بڑی بڑی بالیاں خریدنے کے بعد اکثر پچھتانا پڑتا ہے۔ اس لئے ہلکی پھلکی بالیاں خریدیں۔ کبھی کبھی بالی میں لگے تار کپڑوں میں پھنس جاتے ہیں، اس لئے خریدتے وقت اچھی طرح دیکھ بھال لیں۔ بالیاں خریدتے وقت جلد بازی نہ کریں، اچھی طرح جانچ کرلینے کے بعد ہی خریدیں۔ البتہ چوڑیاں خریدنا نہ بھولیں۔ بازار میں مختلف قسم کی چوڑیاں دستیاب ہیں۔ اپنی پسند کے مطابق خرید لیں۔
جوتے کی خریداری
سینڈل کے بغیر خواتین کی عید ادھوری ہوتی ہے۔ ایک سے 2 انچ والی سینڈل خریدنا زیادہ مناسب ہوتا ہے۔2 سے ڈھائی انچ کی ہیل والی سینڈل سے پیروں کو نقصان پہنچ سکتا ہے۔ آج کل دیدہ زیب جوتیاں کافی پسند کی جا رہی ہیں۔ آپ بھی اپنے لباس کی مناسبت سے جوتی خرید سکتی ہیں۔ جوتی خریدتے وقت تسلی کر لیں وہ آرام دہ ہے یا نہیں۔ اس وقت بازار میں جوتیوں کی کئی ورائٹی دستیاب ہے۔ آپ کو سستی سے سستی اور مہنگی سے مہنگی جوتیاں مل جائیں گی۔ آپ اپنے بجٹ کے مطابق جوتیاں خرید سکتی ہیں۔
میک اپ
عید کی تیاری میں میک اپ بھی شامل ہوتا ہے۔ اس لئے اس کی خریداری بھی لازمی ہے۔جدید ٹرینڈ کے مطابق ’’نو میک اَپ لُک‘‘ بہترین ثابت ہوگی۔ میک اپ میں پیسٹل رنگوں کو ترجیح دیں۔ البتہ گہرے رنگ کی لپ اسٹک کا استعمال کیا جاسکتا ہے۔ میک اپ اچھی کوالیٹی کا خریدنا سمجھداری ہوگی۔
ہیر اسٹائیل
میک اپ کے بعد ہیئر اسٹائل کی بھی اپنی اہمیت ہے۔ بال کھلے رکھنے کے علاوہ جوڑا بھی بنایا جاسکتا ہے۔ ’’بریڈ ہیئر اسٹائل‘‘ ہمیشہ پسند کیا جاتا ہے۔ ہیئر ایکسس سریز کی مدد سے منفرد ہیئر اسٹائل اپنایا جاسکتا ہے۔ البتہ عید سے قبل ایک دو بار وہ ہیئر آزما کر ضرور دیکھ لیجئے گا۔
عید کی تیاری کرتے وقت خواتین چاند رات تک کا انتظار نہ کریں۔ عین وقت کی تیاری میں کوئی نہ کوئی کمی و بیشی رہ جاتی ہے اس لئے بہتر ہے کہ جلد سے جلد ساری تیاریاں مکمل کرلیں تاکہ عید کے دن ہنگامی حالات نہ دیکھنے پڑیں۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
