برصغیر میں شادی کی تقریب کو بہت اہمیت دی جاتی ہے اور اس تقریب کو یادگار بنانے کی ہرکوشش کی جاتی ہے ایسی ہی کوشش انڈیا سے تعلق رکھنے والے بزنس مین دلیپ پوپلی نے بھی کی ہے،پوپلی خاندان ہیروں کے کاروبار سے منسلک ہے۔دبئی میں مقیم بزنس مین اپنی بیٹی کی شادی کی میزبانی بالی ووڈ اور ہالی ووڈ ستاروں کے ساتھ آسمان کی بلندیوں میں خصوصی طور پر تیار کیے گئے طیارے میں کریں گے،امید کی جا رہی ہے کہ یہ شادی ایک نیا ورلڈ ریکارڈ بنائے گی ۔ ہوائی جہاز امارات سے اڑان بھرے گا اور فضاء میں شادی کی رسومات مکمل ہونے پر 3 گھنٹے کی پرواز کے بعد عمان میں لینڈ کرے گا، اس شادی کے لیےبوئنگ 747 کو خاص طور پر تیار کیا گیا ہے تاکہ ہوائی جہاز کے اندر شادی کی رسومات ادا کرنے کے لیے جگہ بنائی جا سکے۔
24 نومبر کو بالی ووڈ اور ہالی ووڈ کی مشہور شخصیات، معززین، دوستوں اور خاندانوں کی موجودگی میں ایک نجی طیارے میں اس پرتعیش شادی کی رسومات ادا کی جائیں گی، جس کے لیے مہمانوں کو لے کر چارٹر فلائٹ آپریٹر جیٹیکس کا بوئنگ 747 طیارہ دبئی سے ٹیک آف کرتے ہوئے عمان جائے گا، ایک ہفتے تک جاری رہنے والی شادی کی تقریبات میں شرکت کے لیے دنیا بھر سے تقریباً ایک ہزار مہمان دبئی کا رخ کریں گے۔
دلہن کے والد اور پوپلی گروپ کے منیجنگ ڈائریکٹر دلیپ پوپلی نے ایک پریس کانفرنس کے دوران بتایا کہ دولہا ہردیش اور دلہن ودھی مہمانوں اور خاندان کے افراد کی موجودگی میں طیارے کے اندر سکھ روایات کے تحت شادی کی رسومات ادا کریں گے، چوںکہ آگ کے ساتھ کچھ رسومات طیارے میں ادا نہیں کی جا سکتیں اس لیے وہ شادی کے دن بعد میں ہوٹل میں ہوں گی.کہا جا رہا ہے پوپلی اپنی بیٹی کی شادی خلا میں کرنا چاہتے تھےلیکن ابھی تک ایسی ٹیکنالوجی نہیں آئی جو یہ ممکن کر پائے۔
فضا میں پوپلی خاندان کی شادی کے اس دوسرے سیکوئل کی منصوبہ بندی میں بارہ ماہ کی محنت لگی، یہ سلسلہ پوپلی کے والد کے خوابوں سے شروع ہوا، جو اپنے بیٹے کی فضاؤں میں شادی کرنا چاہتے تھے اور یہ ایک بلین ڈالر کا آئیڈیا تھا۔ انہوں نے ایئر انڈیا کے چیئرمین سے ملاقات کی اور 1994ء میں آسمان کی بلندیوں میں شادی کی تقریب منعقد کی، پوپلی 1993ء سے دبئی میں آباد ہیں، اور اب 2023ء میں اپنی بیٹی کی شادی کوسب سے مشہور شادی بنانا چاہتے ہیں۔
انکور دی ڈیزائن اسٹوڈیو کی بانی ویڈنگ پلانر چمو آچاریہ نے کہا کہ اس شاندار تقریب کی میزبانی کرنا مشکل نہیں تھا کیونکہ دلیپ کا نظریہ اپنی بیٹی کی شادی کے بارے میں واضح تھا، جیٹیکس طیارے کی بدولت تمام مسافروں کو اس منفرد تجربے سے گزرنے میں سہولت ملے گی، یہ ایک روایتی پرتعیش شادی ہے جس میں بہت ساری شاندار اور مختلف تہواروں جیسے سنگیت اور مہندی وغیرہ شامل ہیں۔
دبئی میں شادیوں پر خرچہ کرنے کی حد آسمان جتنی بلند ہے، جس کی شروعات 0.5 ملین درہم یا اس سے زیادہ سے ہوتی ہے، یہ سب لوگوں کی تعداد اور میزبان کے بجٹ پر منحصر ہے، پوپلی خاندان جیسی شادیوں پر تقریباً 6 سے 7 ملین درہم لاگت آتی ہے اور اس شادی کی لاگت 8 ملین درہم ہے، اس عظیم الشان شادی کو گنیز ورلڈ ریکارڈ میں شامل کیے جانے کے لیے بھیجا جائے گا کیوں کہ یہ اس خطے میں آسمان کی بلندیوں میں ہونے والی اپنی نوعیت کی پہلی شادی ہے اور یہ شادی 1990ء کی دہائی میں اس خاندان کی پچھلی شادی سے بہت بڑی ہے۔
یہاں خاص بات یہ ہے کہ متحدہ عرب امارات کئی مہنگی اور لگژری جنوبی ایشیائی شادیوں کی میزبانی کرتا رہا ہے جس میں اعلیٰ پروفائل بزنس مین، بالی ووڈ کے سپر اسٹارز، سیاست دان اور بیوروکریٹس شریک ہوتے ہیں، یہ شادیاں عام طور پر ایک ہفتے کے دوران ہوتی ہیں جس میں نئے جوڑے کی تقریبات میں شامل ہونے کے لیے مختلف ممالک سے سینکڑوں دوستوں اور خاندان کے افراد کو مدعو کیا جاتا ہے۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
