کرکٹ اگرچہ پاکستان کا قومی کھیل نہیں لیکن پاکستانی قومی کا سب سے زیادہ پسند دیدہ کھیل ہے۔ہم لوگ کرکٹ کے معاملے میں اتنے جذباتی ہیں کہ پاکستانی قومی کا مورال صرف کرکٹ کی بدولت بڑھایا اور گرایا جا سکتا ہے۔پاکستانی ٹیم جب جیتتی ہے تو یہ پوری قوم کی جیت تصور کی جاتی ہے۔کچھ عرصے سے مسلسل جیتتی ہوئی پاکستانی کرکٹ ٹیم جب ورلڈ کپ کھیلنے بھارت گئی تو پوری قوم کو ان سے بہت زیادہ امیدیں وابستہ تھیں لیکن بھارت جاتے ہی کچھ ایسی خبریں آنی شروع ہو گئیں جن کی وجہ سے پاکستانی قوم اپنی کرکٹ ٹیم سے مایوس ہو گئی۔سب سے پہلے بھارتی میڈیانے خبر دی کہ پاکستانی ٹیم نے اپنا پروٹین بیسڈ کھانا کھانے کے بجائے حیدرآبادی بریانی کو فوقیت دی یعنی غیر ذمہ دارانہ رویہ اختیار کیا گیا پھر پاکستانی ٹیم جس سے بہت امیدیں وابستہ تھیں وہ اپنے میچ ہارنا شروع ہو گئی۔بھارت تو پھر بھی ایک مضبوط ٹیم تھی پاکستان کی ٹیم افغانستان سے بھی ہار گئی ،جو ایک انتہائی مایوس کن بات تھی۔اور آخر میں یہ حالات ہو گئے کہ سیمی فائنل میں جانے کی امید بھی تقریباً ختم ہو گئی۔
ان سب حالات میں جلتی پر تیل کا کام بھارتی میڈیا کی جانب سے اس خبر نے کیا کہ بابر اعظم کرکٹ کے بارے میں فکر مند ہونے کے بجائے اپنی شادی کی شاپنگ میں مصروف ہیں اور انھوں نے یہ شیروانی بھارت کے مشہور ڈیزائنرسبیاساچی سے خریدی ہے جو دلہن اور دلہن کے بہترین ملبوسات کے لیے مشہوراور بالی ووڈ سیلیبرٹیز کے پسندیدہ ترین ڈیزائنر ہیں۔اس شیروانی کی قیمت بھارتی 7 لاکھ روپے ہے۔بھارتی روپے کی قدر پاکستانی کرنسی سے کہیں زیادہ ہونے کے باعث یہ شیروانی پاکستانی روپوں میں 23 لاکھ 34 ہزار روپوں سے زائد کی ہے۔ شیروانی پر اتنے خرچے نے سبھی کو حیران کیا ہے۔ یہ کہا گیا کہ یہ شیروانی بابر اعظم نے ٹورنامنٹ میں بقاء کی جنگ والے اس اہم ترین میچ سے قبل خریدی جب ٹیم 6 میچ کھیل کر 4 میں شکست سے دوچار ہوچکی تھی اور سیمی فائنل میں بھی اس کی شرکت غیر یقینی ہے۔ایسے میں ٹیم کے کپتان کی اپنی عنقریب ہونے والی شادی کی خریداری میں مشغول ہونا غیر معمولی بات ہے۔بھارتی میڈیا رپورٹس کے مطابق شیروانی کے علاوہ بابر اعظم نے فائیو اسٹار ہوٹل کے پرتعیش ماحول سے لطف اندوز ہوتے ہوئے زیورات بنانے والی ایک کمپنی سے بھاری رقم پر زیورات بھی خریدے۔شادی کی تیاریوں کے حوالے سےایسی دلجمعی لیکن میدان میں مایوس کن کارکردگی کپتان کی ترجیحات پر سوالیہ نشان اٹھا دیا۔
بھارتی میڈیا کا گمراہ کن انداز
پاکستان کرکٹ ٹیم کے ذرائع کا کہنا ہے کہ بھارتی میڈیا بابر اعظم کی بھارت میں شیروانی کی خریداری کی غلط خبر دے رہا ہے ۔ بابر اعظم نے ٹیم انتظامیہ کے سامنے واضح کیا ہے کہ انہوں نے مہنگی شیروانی نہ خرید ی ہے اور نہ ہی خریدنے کا ارادہ ہے اور اس بارے میں بابر کے منیجر وضاحت کریں گے۔رواں برس بھارتی میڈیا کا یہ بھی دعویٰ تھا کہ بابر اعظم کی شادی رواں برس دسمبر میں ہوگی جبکہ ایسا کچھ نہیں تھا اور بابر اعظم کے والد نے اس خبر کی تردید بھی کی تھی۔ بھارتی میڈیا پاکستان کرکٹ ٹیم کے کھانے کے مینیو کے حوالے سے بھی غلط خبریں پھیلاتا رہا ہے ۔ابلاغیات کے ماہرین کے مطابق بھارتی میڈیا کے اس طرح کے پراپیگینڈا کا مقصد پاکستانی ٹیم کو نفسیاتی طور پر الجھانا بتا یا جا رہا ہے۔پاکستانی ٹیم بھارت میں بھارتی فین کے علاوہ ایک پورا سسٹم جو پوری طرح بھارت کی حمایت میں ہے کی موجودگی میں اپنی پوری مہارت کو آزمانے کی کوشش میں ہے ۔ بھارتی میڈیا اینٹی پاکستان پالیسی اپنا کرغیر ذمہ دارانہ رویے کو اپنائے ہوئے ہے جو کسی طرح بھی قابل قبول نہیں ہے۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
