معروف پاکستانی وی جے، ماڈل، میزبان اور اداکارہ انوشے اشرف رشتہ ازدواج میں منسلک ہو گئیں۔سوشل میڈیا پر شیئر کی گئیں تصاویر سے معلوم ہوتا ہے کہ انوشے اشرف کا نکاح ممکنہ طور پر آن لائن ہوا ہے جبکہ ان کے چند عزیز و اقارب نے بھی ان کے نکاح میں بذریعہ ویڈیو کال شرکت کی۔پوسٹ کی گئی ایک تصویر میں اداکارہ سفید عروسی جوڑے میں نکاح کے دستاویزات پر دستخط کرتے ہوئے نظر آئیں۔انوشے اشرف نے نکاح کا اعلان کرنے کے بعد اپنے دولہا کی تصاویر بھی مداحوں کے ساتھ شیئر کر دی ہیں، ان کا نکاح شہاب رضا مرزا نامی شخص کے ساتھ ہوا ہے۔دوسری جانب اس خوشی کی خبر سامنے آتے ہی سوشل میڈیا پر مداحوں کی جانب سے اداکارہ کو نکاح پرمبارکباد موصول ہونے کا نہ تھمنے والا سلسلہ شروع ہو گیا ہے۔
مزے کی بات یہ ہے کہ شادی کی تصاویر سے زیادہ پوسٹ کا کیپشن توجہ کا مرکز بن گیا ہے، جس میں انہوں نے شادی میں تاخیر کے سبب ملنے والے طعنوں کا منہ توڑ جواب دے دیا ہے۔انہوں نے ان تمام لوگوں جو شادی نہ کرنے یا ہونے پر لڑکیوں کو ٹوکتے ہہیں کو مخاطب کرتے ہوئے لکھا کہ ’بیٹا، آپ نے اب تک شادی کیوں نہیں کی؟ لو جی اب کرلی‘۔
اس کیپشن کے پیچھے وجہ وہ سوال ہے جو ان کو چالیس سال کی عمر تک پوجھا جاتا رہا کہ انھوں نے ابھی تک شادی کیوں نہیں کی؟کچھ عرصے پہلے ایک انٹرویو میں انوشے اشرف نے بتایا کہ انہوں نے شادی کی کوشش کی تھی، ماضی میں اُنہوں نے منگنی بھی کی تھی مگر پھر شادی شدہ افراد کا حال دیکھ کر انہوں نے شادی کا ارادہ ترک کر دیا تھا۔انوشے کا شادی سے متعلق موضوع پر مزید کہنا تھا کہ ان کی نظر میں شادی کے لیے مرد اور خاتون کی عمر کے درمیان فرق کی کوئی اہمیت نہیں ہے، عمر صرف ایک نمبر کی حیثیت رکھتی ہے البتہ ذہنیت ایک جیسی ہونی چاہیے۔انوشے اشرف کا کہنا تھا کہ وہ شادی کے لیے صرف اور صرف اپنے شریک حیات میں ایک چیز دیکھنا چاہتی ہیں اور وہ یہ ہے کہ اُن کا شریکِ حیات اُن کی ذہنیت جیسی ہی ذہنیت رکھتا ہو، دونوں کے خیالات ملتے جلتے ہوں۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
