نکاح کرکےتمام افواہوں کو سچ ثابت کرنے والی جوڑی ماورا حسین اور امیر گیلانی نے دنیا کے سامنے اپنے رشتے کا باضابطہ اعلان کرکے نئی زندگی کی شروعات کرلی ہے۔شادی کے موقع پر ماورا حسین نے ہلکے سبز رنگ کا سنہری کڑھائی والا خوبصورت لہنگا پہنا، جبکہ عامر گیلانی نے سیاہ کرتا پاجامہ زیب تن کیا۔
ماورا حسین اور امیر گیلانی نے “ثبات” اور “نیم” جیسے مشہور ڈراموں میں ایک ساتھ کام کیا، جہاں ان کی آن اسکرین کیمسٹری کو بے حد پسند کیا گیا، سوشل میڈیا پوسٹس اور عوامی تقریبات میں ایک ساتھ نظر آنے کی وجہ سے ان کے درمیان تعلقات کی خبریں گردش میں رہیں لیکن دونوں میں سے کسی نے بھی کبھی باضابطہ تصدیق نہیں کی، تاہم ان کے مداح مسلسل انہیں بطور جوڑی پسند کرتے رہے۔
ماورا حسین مِنی اسکرین کے مقبول چہروں کی فہرست میں شامل ہیں،نازک سراپے اوردلکش نقوش کی حامل ماورا نے مُختصر عرصے میں شوبزمیں اپنی جگہ بنائی ہے،کمپیئرنگ‘ماڈلنگ اورریمپ واک میں اپنی صلاحیتوں کو منوانے کے ساتھ ساتھ درجنوں ڈراموں میں بھی اداکاری کرچکی ہیں ۔ اداکارہ ماورا حسین کی جانب سے امیر گیلانی کے ساتھ نئی زندگی کی شروعات کرنے پر ان کے مداحوں کی جانب سے مبارک باد کاسلسلہ جاری ہے ۔ انسٹاگرام پر 9.1 ملین فالوور رکھنے والی ماورا حسین نے فنّی سفر کاآغاز بطور وی جے کیاتھا جب وہ ”بوم آن لائیو“ میں ناظرین سے گپ شپ کرتے ہوئے ان کی فرمائش کے گانے نشرکرتی تھیں،ان کا شوخ انداز پسند کیاجاتاتھا اور یہی پروگرام ان کے اداکارہ بننے کا باعث بنا،”میرے حضور“ ان کا پہلا ڈرامہ تھا۔
جہاں تک بات ہے امیر گیلانی کی تو ایک پاکستانی اداکار اور ماڈل ہیں، جو اپنی خوبصورت شخصیت اور باصلاحیت اداکاری کی وجہ سے مشہور ہیں.امیر گیلانی کو 2020 کے ڈرامے “ثبات” میں حسن کے کردار سے بے پناہ شہرت ملی، وہ کچھ میوزک ویڈیوز میں بھی نظر آ چکے ہیں اور انہیں آخری بار ڈرامہ “ویری فلمی” میں دیکھا گیا تھا۔تعلیم کی بات کریں تو امیر گیلانی نے امریکہ کی مشہور ہارورڈ لا اسکول سے قانون کی ڈگری حاصل کی، انہوں نے 2022 میں گریجویشن مکمل کی اور ان کی کانوکیشن کی تصاویر ان کے آفیشل انسٹاگرام اکاؤنٹ پر موجود ہیں۔امیر گیلانی ایک نامور خاندان سے تعلق رکھتے ہیں، ان کے دادا سید افتخار حسین گیلانی ایک نامور وکیل تھے، جو 1989-1990 میں محترمہ بینظیر بھٹو کی حکومت میں پاکستان کے وزیرِ قانون بھی رہ چکے ہیں۔انسٹاگرام پر عامر گیلانی کے 345,000 سے زائد فالوورز ہیں۔ اگرچہ وہ سوشل میڈیا پر زیادہ متحرک نہیں رہتے مگر ان کے مداحوں کی تعداد بے حد زیادہ ہے۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
