سینئر اداکارہ تزئین حسین نے شوہر کی وفات کے تقریباً پانچ سال بعد دوسری شادی کرکے نئی زندگی کا آغاز کردیا۔تزئین حسین کی سہیلی سائرہ دانش احمد نے اداکارہ کی شادی کی تصاویر اور ویڈیو شیئر کرتے ہوئے اداکارہ کی نئی زندگی سے متعلق بتایا۔سائرہ دانش احمد نے 25 اپریل کو انسٹاگرام پر تزئین حسین کی شادی کی متعدد تصاویر اور ویڈیوز شیئر کیں، جن میں اداکارہ اور ان کے قریبی دوستوں اور رشتے داروں کو دیکھا جا سکتا ہے۔اداکارہ کی دوسری شادی کی وائرل ہونے والی تصاویر میں انہیں سرخ رنگ کے عروسی لباس میں دیکھا جا سکتا ہے جب کہ ان کے شریک حیات کو بھی روایتی لباس میں دیکھا جا سکتا ہے۔
تزئین حسین سینئر مرحوم اداکار طلعت حسین کی صاحبزادی ہیں، جن کے پہلے شوہر زاہد حسین جون 2020 میں ہارٹ اٹیک کے باعث انتقال کر گئے تھے۔تزئین حسین نے پہلی شادی یونیورسٹی کی تعلیم کے دوران کی تھی اور ان کے پہلے شوہر سے تین بچے بھی ہیں جو اب جوان ہیں۔تزئین حسین نے نوجوانی میں ہی 1990 کی دہائی میں اداکاری میں قدم رکھا تھا لیکن شادی کے بعد بچے ہونے پر انہوں نے شوبز کو خیرباد کہہ دیا تھا۔تزئین حسین نے تقریبا 20 سال بعد 2023 میں ’یوں ہی‘ نامی ڈرامے سے اداکاری کا دوبارہ آغاز کیا تھا اور اب دوبارہ اداکاری کرنے کے دو سال بعد انہوں نے دوسری شادی بھی کرلی۔یہ بات قابل ذکر ہے کہ تزئین حسین طویل عرصے سے شعبہ تدریس سے وابستہ ہیں اور مختلف جامعات میں ایسوسی ایٹ پروفیسر اور ڈپارٹمنٹ ہیڈ کے طور پر اپنے فرائض سرانجام دے رہی ہیں۔
ان کے شوہر کا نام عامر سیدین ہے، جو کراچی سے تعلق رکھتے ہیں۔عامر سیدین مالیاتی شعبے سے تعلق رکھتے ہیں، تاہم انہوں نے “عین سین” کے نام سے مختلف کتابیں اور غزلیں بھی لکھی ہیں۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
