Guzishta dino mashhoor TikToker Samia Hijab ki aik video social media par samne aayi jismein unhon ne inkishaaf kiya ke aik shakhs ko maine shadi se inkaar kiya to usne jawab mein mujhe aghwa karne ki koshish ki, jis ki video aapke samne hai. Internet personality Samia Hijab ne apne Instagram account par upload kiye gaye video bayan mein kaha ke main nahi chahti ke mere sath bhi wohi haadsa ho jo mashhoor TikToker Sana Yousaf ke sath pesh aaya tha.
Samia Hijab ne apni video ke sath ghar ki aik CCTV footage ko bator saboot share kiya hai. Video mein aik shakhs ki janib ishara karte hue TikToker ne us shakhs ka aur uske sheher ka naam bhi bataya hai. Samia ka kehna hai ke maine ise shadi ke liye inkaar kar diya tha, ab yeh mujhe guzishta do se teen mah se qatal ki dhamkiyan de raha hai aur aaj shaam yeh mere ghar aa gaya, mera mobile phone cheena aur mujhe aghwa karne ki koshish bhi ki.
TikToker ka kehna tha ke is se pehle meri dost Sana inkaar par hi qatal ki ja chuki hai, main Sana nahi banna chahti, main un larkiyon mein shumar nahi hona chahti jinhein shadi ke inkaar par qatal kar diya jata hai.
Unhon ne kaha ke maine police se rabta kiya hai, mujhe bohat acha response mila hai, agar main marti hoon to mere marne ki wajah yeh larka hoga. Samia Hijab ne mazeed bataya ke yeh waqia is baat ka saboot hai ke hamare muashray mein khawateen ki raza-mandi aur inkaar ki koi ahmiyat nahi samjhi jati.
Samia Hijab ke mutabiq khawateen ko apni marzi ke mutabiq faislay karne ka haq milna chahiye lekin haqeeqat yeh hai ke unhein aaye roz tashaddud aur dabao ka samna karna parta hai. Social media users ki bari tadaad ne Samia ki kahani par izhar-e-afsoos karte hue mutaliba kiya ke aisay jurm ke khilaf sakht karwai ki jani chahiye taake khawateen ko tahafuz faraham kiya ja sake.
