والدین کسی بھی انسان کی زندگی میں بے حد اہمیت رکھتے ہیں اور اس بات کو صرف وہ لوگ ہی صحیح معنوں میں محسوس کر سکتے ہیں جو ان میں سے ایک سے بھی محروم ہو جائیں۔والدین کے درمیان طلاق کے بعد کے حالات کا سب سے زیادہ بچوں کو سامنا کرنا پڑتا ہے۔والدین دوسری شادی کے بعد اپنی زندگی دوبارہ شروع کر دیتے ہیں لیکن انھیں یہ احساس نہیں ہو پاتا کہ طلاق بچوں کا رشتہ نہیں ختم کرتی۔اس طرح طلاق کے منفی اثرات ایک بچے کی پوری زندگی میں دیکھے جا سکتے ہیں۔ماں باپ کی علیحدگی سے متاثر بچوں کی زندگی عام بچوں سے بہت مختلف ہوتی ہے۔
اسی طرح کے حالات گزشتہ دنوں اداکارہ صاحبہ کی اپنے والد کے ساتھ پہلی ملاقات کی وائرل ویڈیو میں دیکھے گئے جب وہ خود دو جوان بچوں کی ماں ہونے کے باوجود اپنے باپ سے پہلی دفعہ ملاقات کے بعد بے حد جزباتی ہو گئیں اور اپنے والد سے نہ ملنے کی شکایت کرنے لگیں۔ کچھ دنوں پہلے اداکار ساجد حسین کے ایک شو میں بات چیت کرتے ہوئے صاحبہ نے اپنے زندگی بارے بات کرتےہوئے کہا تھاکہ جب ان کی والدہ کی ان کے والد سے طلاق ہوئی وہ پیدا بھی نہیں ہوئی تھیں لیکن بعد میں جب میں دس سال کی تھی ,میری والدہ نے جمال پاشا سے شادی کر لی۔اس انٹرویو کے چند دن بعد سوشل میڈیا پر شئیر کی گئی ویڈیو میں دیکھا جا سکتا تھا کہ اداکارہ سے ملنے ان کے سگے والد آتے ہیں اور دیکھتے ہی دیکھتے یہ ویڈیو وائرل ہو گئی۔
ویڈیو میں دیکھا جاسکتا ہے کہ صاحبہ جذباتی ہوتے ہوئے اپنے والد سے پوچھتی ہیں کہ میرا کیا قصور تھا جو آپ نے کبھی مجھ سے ملاقات کرنے کی کوشش بھی نہیں کی اور پیدائش کے وقت میرا چہرہ تک نہیں دیکھا۔اداکارہ نے اپنے والد سے کہا کہ کیا آپ کو میری پیدائش کی خوشی نہیں تھی؟ آپ کے یہاں اولاد پیدا ہوئی تھی، آپ کیوں مجھے دیکھنا نہیں چاہتے تھے؟صاحبہ کے والد نے کہا کہ مجھے معاف کردو، میں تمہاری طرف دیکھ کر بھی بات نہیں کرسکتا کیونکہ مجھے اپنی غلطی پر غصہ آتا ہے، میں بہت بوڑھا ہوچکا ہوں، اب ٹھیک سے چل بھی نہیں سکتا، اللہ نے مجھے تم سے ملوانا تھا، اسی لیے میری سانسیں بچا کر رکھیں ۔اداکارہ کے والد نے کہا کہ تمہاری پیدائش سے پہلے ہی تمہاری والدہ سے علیحدگی ہوچکی تھی اور جب تمہاری پیدائش ہوئی تو کسی نے مجھے گھر میں داخل تک نہیں ہونے دیا، اسی وجہ سے پیدائش کے وقت تُم سے مل نہیں سکا۔انہوں نے مزید کہا کہ میں بہت خوش ہوں کہ اللہ نے تمہیں ریمبو جیسا شوہر نصیب کیا جو تم سے بےانتہا محبت کرتا ہے اور خوبصورت بچوں کی نعمت سے نوازا۔صاحبہ نے اپنے آفیشل انسٹاگرام اکاؤنٹ پر والد کے ہمراہ لی گئیں چند تصاویر بھی پوسٹ کیں جن میں اُنہوں نے والد کے کندھے پر سر رکھا ہوا ہے۔اداکارہ نے اپنی پوسٹ میں بتایا کہ اُنہوں نے زندگی میں پہلی بار اپنے والد سے ملاقات کی ہے اور اُنہیں دیکھا ہے۔
سوشل میڈیا پر وائرل ہونے کے بعد صارفین نے اس ویڈیو پربہت زیادہ تبصرے بھی کیے۔اکثر لوگوں نے مبارک باد دی،کچھ کا کہنا تھا کہ صاحبہ کی اپنے والد سے شکل بھی بہت مل رہی ہے جبکہ کچھ نے اس بات کو بھی سراہا کہ صاحبہ نےصارفین کو اپنی فیملی سمجھ کر اپنی ذاتی زندگی کے اہم لمحے شئیر کیے۔
صاحبہ نے اپنے والد سے ملاقات کر لی یہ بہت خوش گوار بات ہے لیکن آج کا دور جس میں شادیاں کم اور طلاقیں زیادہ ہو رہی ہیں ہمیں سوچنے کی ضرورت ہے کہ ایک بچے کے لیے ماں اور باپ دونوں کی برابرکی اہمیت ہے اور ان دونوں کے سائے میں پل کر ہی وہ ایک بھر پور زندگی گزار پاتے ہیں۔
عمّارہ خان ایم فل ماس کمیونیکیشن کی طالبہ ہیں اور تقریباْ بارہ سال سے لکھنے کے کام سے منسلک ہیں۔“دل کا رشتہ“ایپ پر بھی خاندان اور شادی سے جڑے موضوعات پر لکھتی ہیں۔
